ILOILO – Nagapanawagan ang Iloilo Provincial Health Office sa mga ginikanan sa probinsya nga suportahan ang programa sang Department of Health nga pagpabakuna sang ila nga mga bata batok sa measles-rubella kag polio.
Sa interview sang Bombo Radyo kay Iloilo Provincial Health Officer Dr. Maria Socorro Quiñon, iya ginpahayag nga sa Pebrero 1 magaumpisa ang isa ka bulan nga mass vaccination kag libre ini para sa mga pumuluyo.
Para sa bakuna batok sa measles-rubella, target sang ahensya nga makabakuna sang mga bata nga nagaedad 9 months old – 59 months old (below 5 years old).
Sa oral polio vaccine, target naman sang ahensya ang bag-ong bun-ag nga mga lapsag tubtob below 5 years old.
Dapat lang nga dal-on sang mga ginikanan ang ila nga mga kabataan sa barangay health station santo sa ila scheduled date.
Safe ang mga bakuna suno kay Quiñon, nahanas sang maayo ang mga magatublok sang bakuna, kag magasuksok man sang nagakaigu nga mga Personal Protectie Equipment.
Kun basehan ang record sang Iloilo Provincial Health Office sang 2020, 119 ang ginsuspetsahan nga nakaangkon sang measles apang 36 lang ang kumpirmado nga nagpositibo sa nasambit nga balatian.
Kalabanan sa mga nagpositibo sa measles ukon tigdas amo ang mga naga-edad 21-30 anyos; buot silingon sini suno kay Quiñom, madamo sa gihapon ang wala nakapabakuna.
Target sang mass vaccination nga malab-ot ang herd immunity ukon macover ang mas daku nga populasyon sang mga kabataan agud malikawan ang outbreak.
