Nagpaandam ang National Economic and Development Authority (NEDA) nga ang pagpabalik sa Metro Manila sa mas istrikto nga quarantine measure ang makapasaka sang kaso sang gutom kag unemployment.
Ang Metro Manila kag apat ka kaiping nga probinsya ang yara subong sa idalom sang general community quarantine nga magalawig tubtob sa Abril 4.
Suno kay NEDA Acting Secretary Karl Kendrick Chua, kun ibalik ang Metro Manila sa modified enhanced community community (MECQ), kapin 266,000 ka COVID-19 cases kag 4,000 deaths ang malikawan.
Apang sa pihak sini, kapin 58,000 ka mga tawo naman ang magadugang sa subong 3.2 million ka tawo nga ginagutman.
128,000 naman ang ginapanan-aw nga madulaan sang trabaho.
Ang Metro Manila kag iban pa nga kaiping nga probinsya ang ginapanan-aw man nga makarecord sang P2.1 billion nga pierde sa income.
Ini ang rason suno kay Chua kun ngaa ginarekomendar sang NEDA nga ipabilin lang ang Metro Manila sa GCQ.
Nahibaluan nga essential travel lang gid ang ginapahanugutan sa Metro Manila, Bulacan, Cavite, Laguna kag Rizal tubtob sa Abril 4.
Ini nga mga areas nga gintawag sang national government nga NCR Plus bubble ang nagapatuman sang istrikto nga curfew kag ban sang mass gatherings.
Limitado man ang operating capacity sang pila ka mga negosyo sa sini nga mga lugar.
