ILOILO CITY – Lauman ang mas maayo pa nga performance sang mga banda sa ‘Battle of the Bands: Handog Concert ng Bombo Radyo at Star FM sa Dinagyang, Free Concert, Free T-Shirt’ sa ila liwat nga pagpasakop sa masunod nga tuig.
Sa interview sang Bombo Radyo kay Mark Montesa, vocalist sang Maria Cafra nga amo ang nag kampeyon subong nga tuig, iya ginpahayag nga kun mahatagan sang kahigayunan nga makasulod ang iya grupo sa 2021, ginapasalig nila nga mas manami pa nga performance ang ila ipakita.
Ini bangud aminado siya nga hugot ang kompetisyon kag indi basta-basta ang ila mga kasumpong.
Suno pa kay Montes, tuman ang pagpasalamat sang iya grupo sa Bombo Radyo kag Star FM bangud nangin ‘worth it’ ang ila kakapoy, sakripisyo kag byahe para sa kompetisyon.
Nahibaluan nga halin pa sa Bacolod City ang Maria Cafra kag ini ang una nga bes nga nangin kabahin sila sang nasambit nga konsyerto.
Ang Maria Cafra ang nakabaton sang P40,000 nga premyo; samtang 1st runner up naman ang QUEUE Band nga nakabaton sang P20,000, kag ginsundan sang Nicene Creed bilang 2nd runner-up nga nakabaton sang P10,000.
Nakabaton man sang P2,000 nga consolation prize ang pito pa ka mga grupo nga Dos, Gen X & Y, Khaeden, Art of Dedma, Garahe Suroy-an, Taft Road, kag TMC.
