Nagpanugyan ang Vice Chairman sang Committee on Constitutional Amendments sa Kamara nga mas maayo nga buksan ang ekonomiya sang Pilipinas sa sektor sang telekomunikasyon kag transportasyon.
Sa interview sang Bombo Radyo kay Iloilo 3rd District Representative Lorenz “Nonoy” Defensor, iya ginpahayag nga kun mapasar na ang charter change sa diin nagatuyo nga bayluhan ang economic provisions sa 1987 Constitution, mahimo magpasar ang kongreso sang mga layi nga maka-address sang aton sitwasyon agud mapasangkad ang ekonomiya sa Pilipinas.
Suno kay Defensor, mas mapadasig ang pagtin-ad sang ekonomiya kun tugutan sang pungsod nga makasulod ang foreign investors sa telekomunikasyon kag transportasyon.
Apang suno sa iya, ang Pilipinas ang isa sa mga pungsod nga “restrictive” sa pagpasulod sang foreign investors.
Kaangot diri ang constitutional amendments nga nagabutang sang probisyon nga “unless otherwise provided by law” sa pila ka seksyon sang konstitusyon amo ang nagadumili sang foreign ownership sa duta, mga dunang manggad, public utilities, educational institutions, media kag advertising.
Kun mapasar suno sa natungdan ang Charter Change, nagpanawagan siya sa publiko nga magpili sang mga masaligan kag indi abusado nga mga lider sa kongreso bangud yara sa mga kamot nila ang mga layi nga makapasangkad sang ekonomiya sa pungsod Pilipinas.
Dugang pa ni Defensor, kun husto ang layi nga ipasar, makabulig ini sa pag-amyenda sang constitution ilabi na sa sektor sang transportasyon kag telekomunikasyon.
Matandaan nga ang ginaduso nga mga amendments ang magasentro lang sa mga probisyon nga naangot sa ekonomiya bilang sabat sa epekto sang COVID-19 pandemic.
