Aktibo nga nagpatuman sang check point sa nagkalain-lain nga parte sang Iloilo ang Iloilo Police Provincial Office (IPPO) sa pagsugod sang election gun ban para sa 2025 midterm elections.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga ang tanan nga police stations ang naglibot agud mag-conduct sang check points kaupod election officers.
Suno kay Araño, nangin smooth sailing ang labing-una nga check point nga nagsugod alas-8 sang aga.
Nagpasalig man ang natungdan nga sige-sige na nga ipatuman ang tikang tubtob nga magtakop ang election period.
Sa mga checkpoint, ang visual inspections lang ang ginatugotan. Ginadumilian ang mga pulis sa pagbukas sang vehicle’s trunk ukon glove compartment sang salakyan, subong man ang pag-require sa mga drayber kag pasahero nga magpanaug kag usisaon.
