Ginalantaw sang Department of Education (DepEd) nga posible madugangan pa ang mga estudyante halin sa basic elementary education tubtub sa senior high school sa Western Visayas subong nga academic year bangud nagapadayon pa ang late enrollment.
Sa interview sang Bombo Radyo kay Mr. Hernani Escullar, spokesperson sang DepEd Region VI, iya ginpahayag nga ginabaton gihapon ang mga kabataan nga nagapa-enroll sa mga pampubliko nga eskwelahan bisan nga sang Hulyo 29 opisyal nga nagbukas ang School Year 2024-2025.
Kabahin man ini sang polisa sang DepEd nga dapat wala sang bata nga pabay-an nga indi maka-eskwela.
As of July 31, may yara sang 1,701,817 enrollees sa rehiyon halin sa kindergarten tubtub sa Grade 12 kun sa diin 898, 385 diri ang sa elementarya; 531, 346 sa Junior High School; kag 272,086 sa Senior High School.
Mas manubo ini sa 2,012,930 nga total enrollment sang nagligad nga tuig apang gin-athag sang natungdan nga nagapadayon pa subong ang encoding rason nga posible magbag-o pa ini nga numero.
Una naman ginplastar sang talatapan nga nangin matalunsay ang opening of classes sa rehiyon bangud man sa mayo nga koordinasyon sa tunga sang mga eskwelahan, local reinforcement entities, kag local government units.
