Gin-anunsyo ni United States Commerce Secretary Gina Raimondo nga masobra $1 billion ukon masobra P55.4-billion ang balor sang investments nga mapasulod sa Pilipinas bangud sa 22 ka mga kumpaniya nga nag-upod sa high-level presidential trade and investment mission nga nagsugod kahapon, Marso 11.
Kahapon man sang nagpakigkita si Raimondo kay President Ferdinand Marcos Jr. kag sa economic team sang Pilipinas kadungan sang pag-abot sini sa pungsod. Siya ang nagatiglawas kay US President Joe Biden sa tuyo nga mapasangkad pa ang trade relations sa Pilipinas.
Pila sa mga kumpaniya nga nagapakigbahin sa sini nga trade mission amo ang FedEx, UPS, United Airlines, Mastercard, VISA, Microsoft, kag Google.
Wala ginsapubliko sang tiglikom kun pila ang eksakto nga investment sang kada kumpaniya, apang ginpahayag sini nga kadam-an sa sini nga mga kumpaniya ilabi na ang tech firms ang magalunsar sang mga programa para sa cybersecurity, artificial intelligence, kag iban pa.
Ginalauman man ini nga magabulig sa semiconductor sector sa Pilipinas amo man sa turismo ilabi na bangud nagdugang ang Cebu sa route map sang United Airlines.
Tanan ini nga investments suno kay Raimondo ang makahatag sang linibo nga mga trabaho.
Gindugang man ni Trade Secretary Alfredo Pascual nga nakapirma na ang ahensya sang agreements sa kadam-an sa sini nga mga kumpaniya —halimbawa, ang Google kag ang tech companies nga may tuyo nga mahatagan sang training kag digital competence ang mga Pinoy.
Subong nga adlaw, magapakigkita man si Raimondo sa mga business groups sa Pilipinas antes ini magbalik sa Estados Unidos sang Amerika. #
