Huyhuy ang abaga sang pila ka taga-probinsya sang Iloilo nga nagpauli sa ila tagsa ka banwa matapos duha ka beses nga naruya sa vaccination center sa syudad sang Iloilo.
Nag-ugat ang reklamo matapos ginbuksan sang syudad ang vaccination sites para sa walk-ins kahapon, Agusto 19.
Sa interview sang Bombo Radyo kay Alias Inday, residente sang Sara, Iloilo, iya ginpahayag nga nagpadulong sila sa vaccination site kahapon sang hapon apang wala na-cater gani nga ginlista lang ang ila pangalan kag ginpasalig nga madala na sila sa lista subong nga adlaw.
Kaina sang aga, aga pa nga nag-abot si Alias Inday kag ang iya masobra 10 ka kaupod sa site sa isa ka mall sa distrito sang Jaro apang wala man gihapon nabakunahan.
Ang rason sang mga personnel sa vaccination site, dapat may authorization si Alias Inday halin sa iya ginatrabahuan nga syudad bangud ginapahayag unahon ang mga nagatrabaho diri sa syudad sang Iloilo.
Gin-schedule naman ang natungdan sa Hwebes para sa COVID-19 vaccination.
Sabat naman ni COVID-19 team spokesperson Mr. Jeck Conlu, kun walk-in sila, pwede nga magbalik sa vaccination site agud nga makapangayo sang proper instruction sa site manager.
