Masobra 100 ka COVID-19 patients ang na-recruit na nga magpartisipar sa randomized controlled clinical trial sa efficacy kag safety sang tawa-tawa extract bilang treatment sa mga may mild to moderate cases.
Sa interview sang Bombo Radyo kay Dr. Philip Ian Padilla, vice chancellor for academic affairs sang University of the Philippines (UP) Visayas, isa ka public health expert kag project team sa amo nga clinical trial, iya ginpahayag nga Septyembre ang target nga bulan agud matapos ang pagtuon sa diin ginalauman nga mapaidalom sa trial ang 150 ka participants sa amo nga bulan.
Suno kay Padilla, sa Phase II nga stage subong sang pagtuon, pagatungaon ang mga pasyente sa duha ka grupo sa diin ang isa ka grupo sang participants ang pagahatagan sang placebo ukon treatment nga wala sang therapeutic value samtang ang isa ka grupo ang pagahatagan naman sang tawa-tawa supplement.
Dira na matumod suno sa eksperto kun bala mas makabulig ang tawa-tawa sa madasig nga pagrekober sang mga pasyente nga may mild to moderate cases kag kun makabulong ang amo nga herbal supplement sa ila nga hilanat kag ubo.
Pahayag ni Padilla, pagkatapos sini, tun-an man kun pila ka dose sang tawa-tawa ang kinahanglan agud mapaayo ang isa ka COVID-19 patient.
Nahibaluan nga available man ang tawa-tawa bilang dietary supplement sa mga merkado kag wala pa sang certification nagikan sa Food and Drug Administration (FDA) agud maggamit bilang bulong.
Sa pihak sini, ginakabig ang tawa-tawa bilang antiviral kag ginagamit sang kadam-an bilang treatment sa trangkaso kag iban pa nga viral infections.
