ILOILO CITY- Nagapabilin sa evacuation center ang masobra sa 100 ka mga evacuees sa Zarraga nga isa sa mga banwa nga ginbahaan bangud sa pag-ulan nga dala sang bagyo Agaton sa Iloilo.
Sa interview sang Bombo Radyo kay Vice Mayor Jofel Soldevilla sang Zarraga, iya ginpahayag nga padayon ang pag-provide sang Local Government Unit sang mga kinahanglanon sang mga evacuees kaangay sang pagkaon kag panapton.
Suno kay Soldevilla, bangud nagabaha sa gihapon sa pila ka porsyon sang banwa, ginpakamaayo nila nga magpatigayon sang mobile kitchen agud managtag nalang sang luto nga pagkaon sa mga pamilya nga wala sang mahimo lutuan bangud nga mataas gihapon ang tubig- baha.
May yara man sang bulong kontra sa leptospirosis kag trangkaso nga ginahatag sa mga residente.
Istoryahan naman sang LGU kag iban nga natungdan nga talatapan ang natuhoy sa paghatag sang financial aid sa mga pamilya nga nagub-an gid sang balay.
