Masobra 100 ka youth groups sa Iloilo ang nagpirma sang unity statement agud mapalawig ang voter registration period ilabi na sa mga area nga ginpaidalom sa istrikto nga lockdown.
Sa interview sang Bombo Radyo kay Mr. Strike Pareja, curator sang Global Shapers Iloilo Hub, iya ginpahayag nga sa sulat nga ila ginpadala kay Commission on Elections (COMELEC) Chairperson Sheriff Abas, nag-apelar sila nga palawigon ang pagparehistro sandig sa Republic Act No. 8189 ukon ang Voter’s Registration Act of 1996, kun sa diin , mahimo pa nga makaparesitro ang mga botante sa sulod sang 120 ka-adlaw bag-o ang regular election.
Suno kay Pareja, ang nasambit nga appeal ang ginpirmahan sang pila ka mga indibidwal nagikan sa nanuhay-tuhay nga youth groups.
Ang nasambit nga nationwide appeal, ginpangunahan sang grupo nga Akbayan Youth sa katuyuan nga nagakadapat wala sang may mabilin nga indi rehistrado para sa 2022 elections.
Sa interview sang Bombo Radyo kay Akbayan Youth Chairperson Dr. Raymond John Naguit, magluwas sa ila ginaduso nga isa ka bulan nga pagpalawig sang pagparehistro, nalakip man sa ila proposal nga mapalawig ang registration hours ilabi na kun weekends.
Gina-ayo man nila ang COMELEC nga maghatag sang simplified digital procedures para sa revalidation sang 6.3 million voters nga wala nalista sang nasambit nga ahensya, kag maghatag sang pagsulundan nga maka-akomodar sang lehitimo nga forms of identification para sa first time voters ilabi na sa mga estudyante kag out-of-school youth nga wala sang easy access sa documentary requirements.
Nagapati naman ang YouVote — ang grupo nga nagaduso sang Registration and Education Campaign sa Iloilo nga crucial ang rolyo sang sektor sang mga pamatan-on sa 2022 elections.
Sa interview sang Bombo Radyo kay Mr. John Michael Suelo, YouVote Leader, chairman sang Association of Law Students in the Philippines kag former Ginoong Pilipinas 2019, iya ginpahayag nga nagakadapat hatagan sang COMELEC sang nagakaigo nga oportunidad ang youth ukon ang sektor sang kabataan nga makaparehistro pinaagi sa pagpalawig sang voter registration period.
Suno kay Suelo, halos tatlo ka bulan nag-untat ang pagparehistro sa syudad kag probinsya sang Iloilo bangud sa quarantine restrictions rason nagakadapat i-konsidera ini sang COMELEC.
