Nagapati ang punong barangay sang Bolong Oeste, Sta. Barbara, Iloilo nga posible nga gina-kontrata ang mga suspek sa pagpangawat sang solar street lamps sa ila nga lugar kag duha pa ka barangay sa amo nga banwa.
Sa interview sang Bombo Radyo kay Punong Barangay Larry De Atras, iya ginpahayag nga masobra na sa 120 ka solar street lights ang nadula pati na sa Bolong Este kag Cabugao Sur sa nagligad nga duha ka semana.
Ini nga mga suga ang ginapanag-iyahan sang Department of Public Works and Highways (DPWH) VI kag wala pa pormal nga na-turn over sa local government unit (LGU).
Suno kay De Atras, sandig sa iya nabatian sa DPWH, nagabalor sang P34,000 ang kada unit sang amo ng proyekto.
Tuman ka damo man suno sa opisyal kun 129 gid ang nadula kag gin-gamit lang sa balay sang suspek, gani nga possible nga may mga nagasugo sa ila. Sang gin-check nila ang mga local junk shops kag mga pwesto sang scrap buyers, wala man na-recover ang amo nga mga suga.
Nahibaluan nga nakuhaan man sang closed circuit television (CCTV) ang tatlo sa mga suspek nga nagkuha sang mga suga sang nagligad nga Byernes sang kaagahon.
Ginbalikan sini nga sang Agusto 2025, may kaangay man nga insidente kag na-identify gani ang suspek kag gindala sa pulis, apang wala man nag-interes ang DPWH suno sa iya nga magpasaka sang kaso.
MAY NA-IDENTIFY NA
Ginkumpirma naman sang Sta. Barbara Municipal Police Station nga may na-identify na sila nga mga indibidwal nga ginaalegar yara sa likod sang pagpangawat sang solar street lights.
Sa interview sang Bombo Radyo kay Police Captain Raphy Señeres, officer in charge sang Sta. Barbara Municipal Police Station, iya ginpahayag nga taga-Barangay Cabugao Sur ang ila natumod nga tatlo ka ginaalegar nga suspek.
Suno sa hepe, sang menor de edad pa lamang ini nga mga indibidwal, may record na sila sa pagpangawat, kag subong, nagtungtong na sila sa legal nga edad.
Ginapreparar na subong ang mga dokumento sa pagpasaka sang kaso.
Suno kay Señeres, gin-abisuhan nila ang mga barangay nga i-report gilayon sa ila kun may nahibaluan sila nga insidente sang pagpangawat agud nga ma-imbestigaran gilayon sang awtoridad kag madakop ang may kahimuan.
Nagdepensa man si Señeres nga padayon man sila sa pagpatrolya, apang nagahingyo sila sang dugang nga bulig sang monitoring sang barangay officials.#
