Nagdangat sa masobra 1,000 ka mga kaso sang human immunodeficiency virus (HIV) ang na-record sang Social Hygiene Clinic sang Iloilo City Health Office (ICHO).
Nahibaluan nga ang mga pinakabata nga may kaso sang HIV amo ang naga-edad sang 16-anyos.
Sa interview sang Bombo Radyo kay Dr. Ma. Odette Villaruel, HIV Coordinator sang nasambit nga clinic, iya ginpahayag nga kalabanan sang mga may HIV amo ang mga kalalakihan nga naga-edad sang 25-34 years old.
Suno kay Villaruel, ang nagapanguna nga mode of transmission amo ang male to male sex, nagapangaduha ang sexual activity kaupod ang both genders (male and female) kag ika-tatlo ang heterosexual ukon male to female.
Ginakabig man ni Villaruel nga makaalarma ang numero bangud magluwas sa nagadamo ang kaso nagapabata man ang edad kag kalabanan sa ila ang estudyante pa.
Magluwas man sa pagdamo sang HIV cases nagataas man ang kaso sang syphilis kag gonorrhea.
Kaangot sini, nagapahanumdom gid ang ICHO nga mangin mahinalungon kag regular nga magpa-test sa ila opisina.
