Nagapanawagan ang gobyerno sang Japan nga mag-doble halong ang publiko ilabi na bangud sa linibo ka mga residente nga ginpangdala sa ospital bangud sang mga balatian nga maangot sa tuman nga init.
Sa isa lamang ka semana halin sang Hulyo 21, lapaw sa 10,800 ka mga tawo ang gindala sa balay-bululngan bangud sa heatstroke, heat exhaustion, kag iban pa nga disorders nga resulta sang init.
Sa sini nga mga kaso, may na-rekord nga 16 ka mga patay sa 14 prefectures sa bilog nga pungsod suno sa Fire and Disaster Management Agency.
Suno kay Bombo Josel Palma, international correspondent sa Japan, 260 ang nagakinahanglan nga ma-ospital sa masobra tatlo ka semana, samtang masobra naman sa 3,600 ang may malip-ot lang nga pagtinir sa medical facilities.
Sa mga na-ospital, 55.6 percent ang naga-edad sang 65-anyos pasaka.
Gina-forecast nga magapadayon ang pag-init sa pungsod sa masunod nga inadlaw gani nga nagapangabay ang awtoridad sa mga pumuluyo nga mag-inom sang madamo nga tubig kag likawan ang pagpati-al sa init.