Gin-report sang Philippine National Police (PNP) nga masobra 1,200 ka police officers ang naapektuhan kag nagpangatubang sang lain-lain nga mga pagpanghangkat sa tion sang drug war ni former President Rodrigo Duterte.
Base sa data halin sang July 2016 tubtub sang June 2022, ginpahayag ni PNP chief Gen. Rommel Marbil nga 1,286 ka mga pulis ang naapektuhan sa ila trabaho lakip na ang 312 nga napatay kag 974 nga nasamaran.
Sa amo man nga tion, 214 ka mga pulis ang nagpangatubang sang 352 criminal cases.
Suno kay Marbil, sa sini nga anum ka tuig, 195 ka mga pulis ang na-dismiss kag kabug-usan nga 398 ang nagpangatubang sang dismissal sa lain-lain nga rason kag sa sini nga numero, 20 pa ang yara sa detention tubtub subong.
“The numbers remind us that the impact of the anti-drug campaign was deeply felt by our police force as well,” suno kay Marbil.
“The data show that while civilians were affected, many officers also paid the price in various ways,” dugang sini.
Matandaan nga iya pag-atubang sa Senate hearing, gin-ako ni Duterte nga ginmanduan sini ang mga pulis nga hayluhon ang drug suspects nga magbato para nga may rason sila nga pangpatyon ang mga ini sa kada operasyon.
Base sa government records, 6,000 ka tawo ang napatay sa drug war.
Base naman sa human rights groups, yara sa 30,000 drug suspects ang napatay, 422 political activists ang nangin biktima sang summary execution kag may 544 cases sang frustrated extrajudicial killing.
