𝗜𝗟𝗢𝗜𝗟𝗢—Ginkakas ang masobra 13,000 ka mga senior citizens nga beneficiaries sang Social Pension Program sang Department of Social Welfare and Development Office (DSWD) Region 6 sa Western Visayas.
Sa interview sang Bombo Radyo kay Atty. May Castillo, spokesperson sang Department of Social Welfare and Development Office Region 6, iya ginpahayag nga ginkakas ang amo nga numero sang mga senior citizens bangud man sa gin-ubra nga reevaluation sang ahensya.
Suno kay Castillo, lakip sa ginkaksan amo ang 1,327 nga pensioners sang Social Security System (SSS) kag Government Service Insurance System (GSIS), kon sa diin, 830 sa mga ini ang may honorarium, samtang 331 ang nagabaton sang suporta halin sa ila tagsa ka pamilya.
Gin-athag man sini nga ang Iloilo ang may pinakamadamo nga ginkakas nga pensioners nga naglab-ot sa 5,324.
Ginasundan man ini sang Negros Occidental nga may 3,282, Capiz nga may yara sang 1,594, Aklan nga may 1,494, Antique nga may 1,308, kag Guimaras nga may 466.
Nahibaluan nga nagsugod ang pag-utod sang ila nga benefits sang Hulyo, kon sa diin, may mga dugang naman nga bag-o nga mga benepesyaryo ang nagsulod sa subong nga tuig.
