ILOILO CITY – Nagsumpa na ang masobra 1,000 nga mga opisyal sang Western Visayas sa partido sang administrasyon nga PDP-Laban, sa mass oathtaking nga ginpatigayon sa Iloilo Convention Center (ICC) nga ginpangunahan ni House Speaker Pantaleon Alvarez.
Gintambungan ini sang pila ka mamalidha kaangay nanday Bataan Rep. Geraldine Roman, Davao City Firs District Rep. Karlo Alexei Nograles, Kabayan Rep. Harry Roque, Rep. Alfredo Benitez sang Negros Occidental kag mga lokal nga opisyal sang Iloilo.
Halin sa gobernador, vice governor, alkalde kag mga punong barangay ang nagsaylo sa PDP-Laban.
Apisar nagtambong sa nasambit nga pagtililipon, wala naman magsumpa sa administration party si Iloilo City Mayor Jed Patrick Mabilog nga una na ginhingadlan ni Presidente Rodrigo Duterte nga ginaalegar drug protector.
Nagpamalibad naman si Alvarez nga magkomento sa posibilidad nga mangin miyembro sang PDP-Laban si Mabilog.
Suno sa House Speaker, welcome ang sin-o man nga pulitiko nga gusto mag-upod sa ila.
Mas makapaayo man suno sa House Speaker kun magsaylo na sa PDP-Laban si Iloilo Governor Arthur Defensor Sr.
Nangin agaw atensyon naman ang ginasuksok sang House Speaker sa pagtambong sini sa oathtaking.
Nagasuksok lang sang T-shirt, short kag tsinelas si Alvarez sa pagsulod sini sa Iloilo Convention Center.
Gilayon naman nagdepensa si Alvarez kun nga-a wala nagasanto sa okasyon ang ginasuksok sini.
Suno sa mamalidha, halin Lunes tubtob Biyernes nagasuksok ini sang barong kag suit gani luyag sini magsuksok sang simple kag kumportable nga panapton kun wala sang opisina.
Nahibaluan nga gikan pa si Alvarez sa Mindanao kun sa diin nagsumpa man ang mga bag-o nga miyembro sang PDP-Laban antres ini nagpadulong sa Iloilo.