ILOILO CITY – Nagahulat ang masobra sa 2, 600 nga trabaho para sa mga Ilonggo sa hiwaton nga job and tourism fair sang Public Employment Service Office- Iloilo sa Agosto 29 sa Casa Real de Iloilo.
Sa interview sang Bombo Radyo kay Mr. Francisco Heler Jr., pinuno sang opisina, iya ginpahayag nga 40 ka mga kompaniya ang magapasakop sa aktibidad kun sa diin, 36 diri ang local companies kag apat naman ang overseas companies.
Suno kay Heler, 1,736 ang job vacancies sa local employment kag 894 job orders para sa overseas employment.
Dugang pa niya, lakip sa mga job vacancies nga ginatanyag para sa local employment amo ang store crew; customer service representative; cashier; service crew; handler; warehouse associate; room attendant, concierge, kag stewarding para sa hotels; kag drivers, passenger assistant officer sa mga kooperatiba.
Sa mga overseas employment naman, ginabaton ang nurses nga magapadulong sa Saudi Arabia kag Estados Unidos, pintor kag welder sa Japan, butcher/ cook sa Croatia, kag building worker/ laborer nga dal-on sa New Zealand.
Pahayag pa niya, agud nga mabaton ang mga senior high school graduates ukon high school level, gin-istorya sang talatapan ang local companies nga kun mahimo, panubu-an ang qualifications sa hiring process.
Lakip sa mga mahimo ubrahan nila amo ang store crew, merchandiser, service crew, delivery driver, salesman, tutor, kag customer service representative.
May yara man sang mga kompaniya nga magabaton sang mga persons with disabilities kag senior citizens nga makabig nga fit to work.
