Masobra 20 ka mga balay sa Barangay Aquino Nobleza East, Janiuay, Iloilo ang ginsulod sang tubig baha kasunod sang pagbubo na naman sang mamunog nga ulan.
Sa interview sang Bombo Radyo kay Ronny Poblacion, residente sang lugar, iya ginpahayag nga ang tubig baha ang naglab-ot sa hawak sang tawo.
Ginpaanggid man ni Poblacion sa bagyo Frank ang natabo kahapon sa diin wala nakapangaman ang mga pumuluyo kag ang mga gamit nila ang naglutaw na sa baha.
Ginalantaw rason sang residente sa pagbaha amo ang mga talamnan nga ginahimo nga subdivision.
Nagpanawagan man si Poblacion sa local government unit sang Janiuay nga kun mahimo lantawon ang sitwasyon ukon kaayuhon ang kanal sa ila lugar bangud ini ang nagabara.
Apang apisar nga wala man nagabara dugang niya, indi sa gihapon makasarang ang kanal sa volume sang tubig nga naga-ilig halin sa mga kabaranggayan.
