ILOILO – Masobra 20 ka mga kabanwahanan sa probinsya sang Iloilo ang nagpalab-ot na sa Iloilo Provincial Disaster Risk Reduction and Management Office nga ini ang apektado sang Low Pressure Area.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga sa numero nga ini, lima ka mga banwa nga ginalakipan sang Calinog, Lambunao, Passi City, Dingle kag Barotac Nuevo ang nakaeksperyensya sang mamunog nga pag-ulan sa diin nagakinahanglan ang mga ini sang nagakaigo nga assistance.
Sa Passi City, kagab-i nagdangat sa critical nga level ang Jalaur River samtang indi naman maagyan sang mga motorista ang national highway sa Barangay Man-it.
Kagab-i, ginbuksan man ang pito ka floodgates sa Jalaur Diversion Irrigation Dam ukon Moroboro Dam sa Barangay Moroboro, Dingle agud mabuhinan ang pressure bangud sang nagsaka nga tubig sa dam.
Sa Ungka Flyover, ginhimo na lang nga kaladlawan sang iban nga pasahero ang ugtas kag huol nga naagyan bangud sa pagbalod-balod sang tubig sa idalom sang amo nga proyekto nga nagpa-delay sa dalagan sang trapiko.
Sa subong, suno kay Bionat, ginatinguhaan sang opisina nga mahatagan sang bulig ang mga evacuees sa nagkalain-lain nga mga kabanwahanan sa probinsya sang Iloilo.
