ILOILO CITY – May pila ka mga Returning Overseas Filipinos nga wala nag-upod sa Iloilo Freedom Grandstand kag nagpabilin sa La Paz Public Plaza subong nga aga.
Sa interview sang Bombo Radyo kay Dannilyn Sorobia, isa sa mga Returning Overseas Filipino nga halin sa Metro Manila, iya ginpahayag nga ang iban sa iya mga kaupod ang ginsaylo sa Iloilo Freedom Grandstand samtang nagahulat kun may yara sang mabakantehan nga hotel room.
Suno kay Sorobia, mas ginpili nila nga magpabilin sa La Paz Public Plaza bangud nga mas malapit ini sa ila nga balay kag mas mahapos ang pagdul-ong sang ila mga himata kun may yara sila sang kinahanglan kasubong sang pagkaon.
Ginpahayag ni Sorobia nga nag-abot sila alas 12 kaina sang kaagahon kag sa ila pag-abot sa nasambit nga plaza, wala gid sang may ginhatag sa ila nga pagkaon ukon bisan mosquito coil man lang.
Magluwas sa lamok, ginareklamo man sang mga Returning Overseas Filipinos ang mahigko nga Comfort Room.
Nagalaum naman ang natungdan nga tanan nga nagpauli ang makatinir sa hotel agud nga maka-umpisa na sa quarantine period.
