Patay ang masobra 20 ka tawo sa masaker sa Democratic Republic of Congo.
Ginasuspetsuhan nga ang notorious nga Allied Democratic Forces (ADF) ang may kahimuan sa amo nga atake sa eastern province sang Ituri sa amo nga pungsod.
Kun basehan ang data sang Red Cross sa Irumu, 36 tanan ka mga bangkay ang naisip sang mga volunteers sa lugar kun sa diin natabo ang massacre.
Antes sini, naga-eksperyensya na ang Ituri kag ang kaiping sini nga North Kivu province sang mga pagpang-atake halin sa armado nga mga grupo.
Pareho nga ginpaidalom sa state of siege ang duha ka probinsya halin pa sang 2021 — isa ka measure kun sa diin ginahatagan sang otoridad ang pinuno sang militar nga pabaskugon pa ang tikang batok sa armado nga mga grupo.
Antes sini, sang Sabado, 27 man ka tawo ang patay sa Beu-Manyama, isa ka lugar sa Beni sa North Kivu — isa man ka pagpang-atake nga ginatudlo gihapon nga kahimuan sang ADF.
Sang Marso, 30 man ka tawo ang patay sa North Kivu kag masobra 50 ka tawo ang patay sa duha ka adlaw nga pagpang-atake sa Irumu.
Ang ADF ang ginakabig nga affiliate sang grupo nga Islamic State.
Nag-ugat ang ADF bilang isa ka rebel coalition halin sa Uganda. Ang pinakadako nga grupo sini ang ginalakipan sang mga Muslim nga nagapamatok kay President Yoweri Museveni, isa ka Ugandan politician kag retired senior military officer.
