Masobra sa 200 Chinese vessels ang na-monitor sang Philippine Navy sa pila ka parte sang West Philippine Sea.
Base sa monitoring sang Philippine Navy, ang numero sang Chinese vessels ang nadugangan halin sa 163 sang nagligad nga semana kag nagsaka sa 203.
Ang pinakamadamo nga Chinese vessels ang nakit-an sa Sabina ukon Escoda Shoal nga yara sa 71 nga ginabug-usan sang 53 “maritime militia” vessels, siyam ka Chinese navy ships, kag siyam ka Chinese coast guard vessels.
Yara naman sa 52 ang na na- monitor malapit sa Pag-asa Island, kag 36 sa Iroquois Reef.
Suno kay Philippine Navy spokesman for the West Philippine Sea Rear Admiral Roy Vincent Trinidad, ini ang pinakamadamo nga numero nga na-monitor subong nga tuig sa bilog nga West Philippine Sea.
Pahayag niya, ini naangot sa mas dako nga atensyon nga nahatag sa Escoda ukon Sabina Shoal sa nagligad nga pila ka semana.
Sa pinakaulihi nga insidente sa Escoda Shoal, pila ka beses nga ginbungguan sang Chinese Coast Guard ship ang Philippine Coast Guard vessel BRP Teresa Magbanua nga nagresulta sa pagkaguba sang barko sang Pilipinas.
Ginsiling naman ni Trinidad nga indi makaalarma ang numero sang Chinese ships.
Nanindugan man ini nga ang presensiya sang China sa Philippine exclusive economic zone ang illegal.
