ILOILO CITY- Ginpa-Bombo sang mga drivers sang e-bike sa banwa sang Oton ang ginaalegar indi pagpakita sang konsiderasyon sa ila palangabuhian sang mga opisyales sang banwa.
Sa interview sang Bombo Radyo kay alyas Kano, iya ginpahayag nga humalin pa sang Enero sang wala na makabyahe ang masobra 200 ka mga drivers sang e-bikes bangud wala sila gintagaan sang permit sang local government unit.
Suno kay Kano, may yara na kuntani sang mga placards nga ipanghatag sa ila agud makabyahe apang ginpunggan ini sang banwa.
Pahayag niya,gin-athag naman sang Land Transportation Office nga indi na kinahanglan magkuha sang registration sa ahensya bangud nga indi sakop sang regulation ang kategorya sang ila ginabyahe nga mga e-bikes nga yara lamang sa 25-30 kph ang speed, gani nakadepende na sa local government ang paghatag sang permit sa ila.
Suno sa iya, nakapakig-angot na man sila sa Municipal Council kag kay Vice Mayor Neil Olivares kag nagapamalabag gid ang mga ini,apang sa bahin ni Mayor Sofronio Fusin, ginpahayag ni alyas Kano nga suportado sang alkalde ang kawsa sang mga drivers.
Sa pagkamatuod, sang nagligad lang nga semana, nakig-angot man sila liwat sa Sangguniang Bayan apang madamo lang sang ginarason sanday Vice Mayor Olivares kag mga Sangguniang Bayan members.
