Nagpanglakaak sa masobra 200 ang napatay sa Nepal bangud sa pagbaha kag sa pagkatiphag sang duta dala sang mabaskog nga pag-ulan.
Suno pa sa home ministry, magluwas sa 209 nga kumpirmado nga patay, may 29 pa nga missing.
Sa masobra 4,200 nga na-rescue sang otoridad, kalabanan ang nakaangkon sang samad kag subong ginabulong sang response teams.
“We intensified aerial rescue for people who are sick or still need to be brought to safety,” suno kay home ministry spokesman Rishi Ram Tiwari.
Kadam-an sa napatay ang halin sa syudad sang Kathmandu nga nalapawan sang tubig-baha. May landslide pa nga natabo sa highway 16 kilometres halin sa amo nga city.
Ini nga pag-inulan ang ginalaragway nga pinakamalala sa sulod sang pila ka dekada nga naeksperyensyahan sa eastern kag central regions sang pungsod.
Suno sa Nepal police, posible nga maglawig pa sang pila ka adlaw ang rescue operations.
Sa nagligad nga 24 ka oras, lakip sa na-retrieve amo ang 100 ka mga bangkay nga nalubong sa debris lakip na ang halin sa nagkalalubong nga mga pampasahero nga salakyan.
Nagbalik naman ang domestic flights apang may pila pa ka lugar nga mabudlay agyan bangud sa landslides. Nag-untat na subong ang pag-ulan sa Nepal kag ginalauman nga mgaayo na ang kondisyon sang tiyempo sa masunod nga inadlaw.
