Ginmanduan sang Department of Energy (DOE) ang National Grid Corporation of the Philippines (NGCP) nga mag-install ang masobra 250 megawatts nga battery energy storage system agud mabuligan nga masolbar ang naganubo nga suplay sang kuryente sa Visayas grid.
Ang mga energy storage facility yara sa Iloilo, Negros, Cebu kag Leyte.
Suno kay Energy Secretary Sharon Garin, kun madayon ang mga proyekto, posible nga magnubo sang tubtob 50 porsyento ang yellow kag red alerts sa Visayas grid.
“We have instructed them to connect the four power plants of batteries located in Iloilo, Negros, Cebu, and Leyte para ma-balance lahat. Kapag natuloy itong mga project na ito at matuloy din itong mga batteries, at the minimum, 50% less na ang mga yellow at red alerts dun sa Visayas,” suno sa tiglikom.
Samtang, ginpahayag sang NGCP nga may pila ka power plant nga naka-forced outage.
Kahapon, Agusto 25, may yara na naman sang red kag yellow alerts sa Visayas grid.
Ang yellow alert ginapaguwa kon indi igo ang operating margin agud malab-ot ang kinahanglanon nga reserve sang transmission grid. Ang red alert naman ginadeklara kon indi igo ang suplay sang kuryente para sa demand sang mga consumer kag sa regulating requirements sang grid.
Ginalauman naman sang DOE nga makabalik sa operasyon ang pila ka mayor nga power plant sa masunod nga mga adlaw kag semana, lakip ang TVI Unit II kag KEPSCO SPC Power Corporation.
Ginatan-aw man sang ahensya ang paggamit sang mga liquid fuel facility bilang dugang nga source sang kuryente.
Pahayag ni DOE Undersecretary Mario Marasigan, kabahin diri ang posible nga pagbalhin sang isa ka power barge halin sa Navotas pakadto sa Visayas, nga sa katapusan nga configuration ikonekta sa Cebu, malapit sa Naga power facilities.#
