Iloilo – Ginalauman ang masobra 30 degrees celsius nga temperatura kasunod sang pagsugod na sang El Niño ukon dry season sa pungsod.
Sa interview sang Bombo Radyo kay Jeff Patrick Maquiling sang Philippine Atmospheric, Geophysical and Astronomical Services Administration- Iloilo, iya ginpahayag nga nagakadapat nga magdoble halong ang mga pumuluyo bangud sa mahimo epekto sang tuman ka-init sang panahon kaangay sang heat stroke kag dehydration.
Suno kay Maquiling, kinahanglan man nga magdala sang payong kag mag-inom sang madamo nga tubig sa tanan nga tion agud malikawan ang anuman nga risgo sa ikaayong lawas.
Kaangot diri, ginpahayag sang natungdan nga ginapanan-aw man ang mahina nga patubas sang mga pananom bangud sa tuman nga init.
Nagpanugyan naman si Maquiling sa mga mangunguma nga magtipon na sang madamo nga tubig bangud sang mainit nga panahon.
