ILOILO CITY – Gin-suspend ang klase sa Janiuay National Comprehensive High School matapos ginpangdala sa ospital ang masobra 30 ka mga estudyante matapos ginapahayag gin-possess.
Sa impormasyon nga nabaton sang Bombo Radyo Iloilo, may yara sang nalipong nga mga estudyante, may nagagurob, nagapalak kag nagasinggit.
Ginapahayag nga una nga nalipong ang mga babayi kag ginsundan sang mga lalaki.
Natabo ini matapos gina-alegar gintapas ang puno sang lunok sa amo nga eskwelahan.
Sa interview naman sang Bombo Radyo kay Janiuay, Iloilo Mayor Paulino Parian, iya ginpahayag nga ang pagkalipong sang pila ka mga estudyante ang natabo na humalin sang nagligad nga semana kag kahapon nga adlaw.
Suno kay Parian, indi pa matumod tubtob subong kun ano ang rason sang pagkalipong sang mga estudyante.
Ginpangdala sa ospital kag clinic ang mga nalipong nga estudyante para sa nagaka-igo nga pagbulong.
Samtang, sa interview naman sang Bombo Radyo kay Dr. Vicente Salarda, Principal III sang Janiuay National Comprehensive High School, iya ginpahayag nga 13 ka mga estudyante subong nga adlaw ang nalipong kag naglain ang pamatyag.
Suno kay Salarda, sa 13 ka mga estudyante, isa ang natukiban nga may asthma.
Pahayag niya, matapos nga nakapahuway, naumpawan man ang mga ini.
Kahapon, 24 man ka mga estudyante ang nalipong nagikan sa nagkalain-lain nga year level kag section kun sa diin ang duha diri ang nangin hysterical.
Dugang pa sang natungdan, mainit ang tyempo kag posible nga wala nakapamahaw ang iban nga mga estudyante ukon may yara sang masakit.
Gin-athag niya nga wala sang may gintapas nga puno sang lunok sa amo nga eskwelahan kag wala nagbag-o ang tingog sang mga kabataan.
Agud nga makapahuway ang mga estudyante, nagdesisyon ang eskwelahan nga sa Lunes na lamang ibalik ang klase.
