ILOILO CITY – Masobra sa 30 ka residente sang Brgy. Baldoza, La Paz, Iloilo City ang nagreklamo bangud sa ginapahayag indi patas nga pagpanghatag sang food packs.
Sa interview sang Bombo Radyo kay Shano Danay, iya ginpahayag nga ang iban sa ila ang makapila na ka beses nga nakabaton sang food packs.
Suno kay Danay, ang pagbyahe lamang sang trisikad ang iya palangabuhi-an kag bangud ginpauntat ang byahe, tuman ka pigado ang ila nga pagpangabuhi.
Ginpahayag ni Danay nga kun tani, alalangay ang pagpanghatag sang food packs, manggaranon man ukon imol.
Suno naman kay Juanito Bado, pila na ka adlaw ang nakaligad humalin sang nakabaton siya sang food packs.
Bangud nga 12 sila sa ila pamilya, ginpahayag ni Bado nga naubos na ang nahatag nga food assistance apang kasubong sa reklamo ni Danay, wala pa siya nakabaton sang dugang nga food packs bangud sa ginapahayag indi patas nga tagtaganay.
Sa subong, wala pa sang pahayag ni Punong Barangay Jonathan Jalandoni Jr. may kaangtanan sa nasambit nga reklamo.
