Naglab-ot sa masobra 49,000 ka mga indibidwal sa probinsya sang Iloilo ang apektado sang habagat.
Santo sa datos nga ginpagwa sang Iloilo Provincial Disaster Risk Reduction and Management Office (PDRRMO), naghalin ang apektado nga mga indibidwal sa 22 tanan ka mga banwa nga ginabug-usan sang 210 ka barangay nga may ara sang masobra 13,000 ka mga pamilya.
Nakarekord ang opisina sang 355 ka mga balay nga nagkalaguba kun sa diin 322 diri ang partially damaged kag 33 naman ang totally damaged.
Nahibaluan nga ang banwa sang Pototan ang naka-deklarar na sang state of calamity bangud sa halit sang pag-ulan kag pagbaha.
Nauna naman nga ginpahayag ni Governor Arthur Defensor, Jr. nga nagdangat na sa masobra P2.2 million ang balor sang kahalitan sa agrikultura ilabi na ang mga talamnan sa Lambunao, Leganes, Oton, Pototan, San Joaquin, San Miguel, kag Tubungan.
