ILOILO CITY- Naglab-ot sa 3189 ka mga balay ang nagkalaguba sa probinsya sang Iloilo kasunod sang pagbaha nga resulta sang pag-ulan nga dala ni Bagyo Agaton.
Sa interview sang Bombo Radyo kay Rara Ganzon,focal person sang Provincial Social Welfare and Development Office(PSWDO), iya ginpahayag nga base sa ila pinakaulihi nga data, sa amo nga numero,97 ang totally destroyed kag 3092 ang partially destroyed.
Suno kay Ganzon, sa bahin naman sang mga evacuees, 6521 families ukon 22,000 ka mga indibidwal ang yara sa evacuation centers sa 25 tanan ka mga banwa nga apektado sang pagbaha.
Dugang ni Ganzon, nakahatag naman sila sang masobra sa 7,000 family food packs sa banwa sang Ajuy, Sara, Banate, Dingle, kag Barotac Viejo.
Subong nga adlaw, Abril 14, natalana man nga dul-ungan sang relief packs ang Pototan, Zarraga kag Banate.
