ILOILO CITY – Ginduso ni US President Joe Biden ang $33 billion nga package para sa pagpa-armas kag suporta sa Ukraine sa away sini batuk sa Russia subong man ang paggamit sang luxury assets nga ginkuha sa Russian oligarchs agud nga magbayad sa gin-abuso nga pro-Western country.
I-anunsyar ni Biden ang masunod nga hugnat sang wala nahibaluan nga tikang agud nga pinahan ang Russia sa pagsakop sini sa Ukraine kag ang pagpadasig pa sang pagdul-ong sang Weastern weaponry para sa Ukrainian troops.
Ang ginaduso nga $33 billion ukon masobra P1.74 trillion package ang ginalakipan sang $20 billion ukon P1,051 trillion sa military kag iban pa nga security assistance.
Ang $8.5 billion ukon P447 billion nga para sa economic aid ang makabulig sa gobyerno sang Ukraine agud nga marespondehan ang krisis samtang ang $3 billion ukon P157 billion ang para sa humanitarian assistance kag ma-address ang global food supply price shock.
Kinahanglan sang US Congress nga aprubahan ang request kag nagpasalig ang Republicans kag Democratic party nga handa sila nga magsuporta sa Ukraine.
Samtang, ginpahayag man ni Biden nga ang tanan nga proceeds sang forfeited kleptocratic property nga gin-sanction sa mga oligarch billionaires ang gamiton agud nga mabayaran ang halit nga tuga sang pag-abuso sang Russia sa pungsod Ukraine.
Sa subong, nagdangat na sa masobra sa $30 billion ukon P1.57 trillion nga Russian assets ang gin-freeze sang EU allies lakip na ang halos $7 billion ukon P368.13 billion nga luxury goods sang oligarchs lakip na ang mga yate, art, real estate kag helicopters.
Ang Estados Unidos ang nag-sanction man kag nag-block sang mga barko kag eroplano nga nagdangat sa masobra $1 billion ukon P52.5 billion kag ang pag-freeze sang minilyon nga dolyar sang assets nga ginapanag-iyahan sang Russian elites.
Ang pinakaulihi nga nakuha amo ang $90 million ukon P4.73 billion nga superyacht nga ginpanag-iyahan sang Russian billionaire nga si Viktor Vekselberg.
