Masobra 4 million pesos nga balor sang ilegal nga droga, na-confiscate sang IPPO humalin sang pagpungko si P/Col Ronaldo Palomo bilang director

ILOILO – Masobra sa P4 million pesos nga balor sang iligal nga droga ang na-confiscate sang Iloilo Police Provincial Office humalin sang nagpungko si Police Colonel Ronaldo Palomo bilang director.

Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga humalin sang Marso 4 tubtob Abril 16, may yara sang ginpatigayon nga 34 ka mga drug buy-bust operations.

Suno kay Araño, sa numero nga ini, 39 ang nadakpan kun sa diin, 13 ang high value individuals.

Ginpahayag dugang sang natungdan nga narekober man sa operasyon ang ginabulubanta 623.798 nga gramo sang illegal drugs nga may standard drug price nga nagdangat sang P4,241,826.

Apisar sang sunod-sunod nga mga accomplishments sang mga kapulisan suno sa spokesperson, kinahanglan pa sa gihapon sang mga ini nga panikasugan agud mapapas ang illegal drug trade sa probinsya.

Ini man ang kasunod sa mando ni Iloilo Governor Arthur “Toto” Defensor Jr. kag Police Regional Office Director Police Brigadier General Leo Francisco.