Masobra 400,000 ka mga puluy-an ang wala sa gihapon sang kuryente sa United Kingdom kasunod sang paglaslas sang bagyo Eunice.
Suno kay Bombo International Correspondent Lloyd Balatongan, direkta sa United Kingdom, gin-isyu na ang yellow warning sa England, Wales, kag Northern Ireland.
Samtang, nagbubo naman ang mamunog nga pag-ulan sa Cumbria, Lancashire kag West Yorkshire.
Sandig sa British forecaster Met Office, naapektuhan man ang ginapatigayon nga clearing operations sa pila ka bahin sang United Kingdom bangud tuman kabaskog sa gihapon ang hangin nga dala sang bagyo.
Padayon man gina-abisuhan ang minilyon ka pumuluyo nga indi anay maggwa sa ila mga balay bangud sa delikado nga sitwasyon.
Base naman sa pinakaulihe nga data, 16 na ka patay ang narekord bangud sa bagyo Eunice.
