𝗜𝗟𝗢𝗜𝗟𝗢 𝗖𝗜𝗧𝗬 — Magapatuman sang transport break ang masobra 400 ka mga modernized units sang pila ka mga kooperatiba sa syudad agud magprotesta sa ginaduso sang gobyerno nga pauntaton ang Public Utility Vehicle Modernization Program (PUVMP).
Sa interview sang Bombo Radyo kay Raymundo “Boyet” Parcon, Presidente sang Western Visayas Transport Cooperative (WVTC), iya ginpahayag nga hiwaton ang transport break sa Lunes, Agosto 5, 2024 nga magasugod sang alas-1:00 tubtob alas-3:00 sa hapon.
Suno kay Parcon, ang kahiwatan ang kadungan sa nationwide nga transport break nga nagasuporta man sa kooperatiba.
Ginpahayag man sini nga ang tanan nga transport cooperatives sa syudad ang magadala sang ila modernized jeep kag maplastar sa magtimbang nga bahin sang diversion road.
Gin-athag man ni Parcon nga masakit ini para sa ila bangud ang gobyerno man nagtulod sa ila sa modernisasyon, apang gobyerno man mismo ang magalaglag sa ila sa ulihi.
Nahibaluan nga sa bug-os nga Western Visayas, may yara sang 95 ka units ang sa idalum sang Western Visayas Transport Cooperativ, kon sa diin, naglab-ot sa P200 million ang ila nangin utang agud mabakal ang mga modern jeepneys.
Bangud man sa tikang, nabutang sa ital-ital ang ika-duha nga loan sang kooperatiba halin sa Land Bank of the Philippines.
May ginapaabot pa kotani nga 150 ka mga modernized jeep ang amo nga kooperatiba.
Ginahulat naman nila ang mangin desisyon ni President Ferdinand Marcos, Jr. kag kon pahanagutan man sang presidente ang ginaduso sang mga senador, suno kay Parcon, indi sila magduha-duha nga tawgon nga butigon kag wala ini sang hinambalan.
