Nagdangat sa masobra 4,100 ka mga pamilya ang apektado sang paglaslas sang Bagyo Opong sa syudad sang Iloilo.
Sandig sa 8:00 p.m. nga update nagikan sa Iloilo City Emergency Operations Center, 612 sa sini nga mga pamilya ang nagtinir anay sa mga evacuation centers.
94 naman ang naisip nga mga barangay nga ginbaha, apang naga-amat-amat naman sa pag-subside ang pila ka areas.
Sa pihak nga bahin, suno pa sa Iloilo City Disaster Risk Reduction and Management Office (CDRRMO), 10 ka mga balay ang nahalitan sang mamunog nga ulan kag mabaskog nga hangin kun sa diin duha ang naubos gid guba samtang walo naman ang may porsyon lang nga na-damage.
Magluwas diri, 18 ka puno sang kahoy kag lima ka mga poste ang nagkalatumba.
Base pa sa opisina, wala sang na-rekord nga mga indibidwal nga nasamaran.
Sa 8:00 sa gab-i nga bulletin sang DOST-PAGASA, nakabutang nga ginbawi na ang tanan nga wind signal sa tanan nga porsyon sang Iloilo kasunod sang paglayo na sang sentro sang Bagyo Opong.
Magaguwa ang bagyo sa Philippine Area of Responsibility buwas, Septyembre 27.
