Nagutman, wala sang gina-istaran kag wala sang sweldo ang masobra 50 ka mga construction workers nga lunsay halin sa Cadiz City, Negros Occidental kag nagpadulong sa syudad agud magtrabaho sa Iloilo Business Park sa Mandurriao, Iloilo City.
Sa interview sang Bombo Radyo kay Janrey Paul Calvo, isa sa mga construction worker, iya ginpahayag nga nag-abut sila sa syudad sang Enero 25.
Suno sa iya, masobra na sa duha ka semana nga wala pa sila sang nabaton nga sweldo magluwas sang P450 nga ginhatag sa ila sang nagsugud ang trabaho.
Nagpanawagan ang mga ini nga tani mabuligan sila nga makapauli sa Negros Occidental.
Nagpangabay man ini sa ila nga contractor nga balikan na sila sa Iloilo City kag bayaran na ang inadlaw nga ila gin-ubrahan agud nga may madala sila nga kwarta pauli sa ila pamilya.
Ginbululigan man sang Barangay officials kag residente sang Barangay Bakhaw, Mandurriao nga mabuligan kag mahatagan sang pagkaon ang mga trabahador.
