Nagapabilin sa gihapon sa evacuation center ang masobra 50 ka pamilya nga gin-evacuate matapos ang natabo nga rockslide sa Barangay Dagsaan, Buenavista, Guimaras.
Sa interview sang Bombo Radyo kay Buenavista Guimaras Mayor Eugene Reyes, iya ginpahayag nga sang damlag lang, nakapadala na ang Department of Social Welfare and Development (DSWD) Region VI sang kinarton nga food packs, sleeping kit, hygiene kit kag kitchen kit sa mga apektado nga pamilya.
Suno kay Mayor Reyes, kaupod ang Department of Environment and Natural Resources (DENR), padayon pa nga ginapreparar ang lugar nga mahimo sayluhan kag patindugan sang balay sang mga pumuluyo.
Pahayag sang alkalde, magluwas sa P20,000 nga bulig sang local government unit sa kada pamilya, nagpasalig man sang financial assitance ang National Housing Authority.
Nahibaluan nga indi na pagpabalikon sa ila mga balay ang mga pumuluyo nga gin-evacuate sandig sa nangin assessment sang Mines and Geo-sciences Bureau (MGB) sang LGU sang Guimaras nga ”highly prone” sa rockslide kag landslide ang Barangay Dagsaan.
