ILOILO CITY – Masobra sa tunga sa milyon ka pesos nga balor sang alahas ang nakuha sang mga kawatan sa Aljun Jewelry Store sa isa ka mall sa Guanco St., Iloilo City.
Sa exclusive interview sang Bombo Radyo Carmela, saleslady sang nasambit nga jewelry shop nga nagpahinago lang sang pangalan, iya ginpahayag nga 46 ka bilog nga singsing ang ginkawat sang lima ka mga kawatan.
Bag-o pa man natabo ang insidente, ginpahayag sang saleslady nga tatlo sila nga nagabantay kaupod sang tag-iya sang nag-abot ang mga suspek.
Ang iban sa mga suspek ang naga-istorya sa security guard samtang ang iban naman ang nagapanilag sa palibot kag nagalingaw sa ila nga tatlo.
Bangud sa kasakuon, ginpahayag sang saleslady nga wala nila natalupangdan nga ginkuot na sang isa sa mga suspek ang box nga naga-unod sang mga singsing.
Ila na lang nahibalu-an nga nabiktima sila sang Salisi gang matapos nga ginpangita ang nadula nga mga singsing kag ginlantaw ang kuha sang Closed Circuit Television (CCTV) camera.
Ginapahayag nga kalabanan sa mga suspek ang pangayaw santo sa ila nga panghambal.
Matandaan nga indi na ini ang labing una nga kahigayunan nga ginkawatan ang nasambit nga jewelry shop sa diin sang 2018, balor P10 million nga alahas ang nakuha sang mga kawatan.
