Nagtipon ang masobra 50,000 ka tawo sa Plaza de San Pedro agud magtambong sa selebrasyon sang Jubilee sang mga Pamilya nga ginpatigayon ni Pope Leo XIV.
Sa iya homiliya, ginpabutyag sang Santo Papa ang kaimportansya sang pamilya bilang pundasyon sa pagpadayon sang pagtuo, paghigugma, kag kabuhi halin sa isa ka henerasyon padulong sa masunod.
Ginpanugyan niya nga ang mga “balaan nga kasal” amo ang ehemplo sang pagbinuligay, pagkabuhi nga may pag-unongay.
Ginpakita niya bilang ehemplo ang pamilya nanday Luigi kag Celia Martin, mga ginikanan ni Santa Therese of Lisieux, kag ang pamilya Ulma halin sa Poland nga naghalad sang ila kabuhi bangud sang pagtuo.
Suno kay Pope Leo XIV, sa pamilya ginapasa ang pagtuo kag ginapakigbahin pareho sang tinapay kag paghigugma sa tagsa ka miyembro. “Ang pamilya amo ang pinakamaayo nga lugar nga makita si Jesus nga pirmi nagahigugma kag nagahandum sang kaayuhan sang tanan,”.
Ginsaysay man niya ang pahayag ni Pope Francis nga ang kabuhi nakuha naton antes pa naton ini ginhingyo, kag ginpahanumdom niya nga ang kabuhi sang tawo nagasugod sa sulod sang isa ka pamilya.
Bilang katapusan sang selebrasyon, ginpangunahan ni Pope Leo XIV ang pag-ampo sang Regina Caeli, isa ka Marian nga pangamuyo, kag naghatag sang mensahe sang paglaum sa mga kabataan kag pasalamat sa tanan nga pamilya, labi na gid sa mga lolo kag lola bilang mga modelo sang pagtuo.
