Ginpatuman na epektibo subong nga adlaw sang Martes ang big time price hike ukon pagsaka sa presyo sang produktong petrolyo.
Sa ginpagwa nga advisory sang mga oil companies, yari ang pagsaka sa presyo:
- P2.70 sa kada litro sang gasolina
- P6.55 sa kada litro sang diesel
- kag P5.45 sa kada litro sang kerosene
Kun lantawon naman ang data sang Department of Energy (DOE), yari ang net increase ukon ang ginsaka sa presyo sang gasolina halin sang una nga semana sang Enero 2022 tubtub sa katapusan nga petsa nga may yara sang oil price movement:
** Ang kada litro sang gasolina ang nagsaka sang P23.85
** P30.30 per liter ang saka sa litro sang diesel
** kag P27.65 per liter ang saka sa litro sang kerosene
Suno sa mga eksperto halin sa oil industry, posible nga magpabilin nga mataas ang presyo sang produktong-petrolyo matapos nga nag-anunsyo ang Saudi Arabi nga pasakaon sini ang presyo sang crude oil sa Hulyo.
Ini apisar nga nagsugtanay na ang Organization of the Petroleum Exporting Countries (OPEC+) kag ang ila nga mga kaalyado nga padamuon pa ang ila nga produkto sa Hulyo kag sa Agusto.
Ginapahayag nga nagasaka man ang demand sa sini nga produkto, ilabi na bangud summer season sa Estados Unidos kag bangud nga ginpahalog na ang Covid-19 restrictions sa China.
