ILOILO CITY – Masobra 6,000 na ka mga motorista ang nadakpan sang Public Safety and Transportation Management Office nga naga illegal park sa mga dalanon sa syudad sang Iloilo umpisa sang ginpatigayon ang Oplan Hawan ukon road clearing operations.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga masami nga ila madakpan nga naga illegal park amo ang mga pribado nga salakyan.
Sa tion nga wala sang driver ang salakyan nga naga illegal park sa tion nga ini ang madakpan, may yara ini sang multa nga P300 samtang P1,000 naman ang multa sa mga madakpan nga salakyan nga yara ang tag-iya.
Suno kay Conlu, ang mga nadakpan nga mga motorista nga naga illegal park amo ang mga yara sa bahin sang Iloilo City Proper, Jaro kag Mandurriao.
Samtang ginhigtan naman ang mga No Parking signs sa Iznart St., malapit sa Iloilo Central Market bangud may mga tig-a ulo nga mga driver sa gihapon nga naga illegal park apisar nga may yara na sang signages.
Paathag ni Conlu, ang mga lubid nga ginhigot sa mga no parking signs ang ginabugto pa sang iban nga mga motorista agud lamang nga maka park.
Plano naman sang Public Safety and Transportation Management Office nga magpatigayon sang pagsinapol sa masunod nga semana agud nga istoryahan ang maayo nga lihok nga indi mangin sablag ang mga higot sa mga pumuluyo sa tion nga magtabok ukon magbantay sang jeep.
