Ginpasaka na sang United Nations sa masobra 670 ang numero sang ginakahangaw-an nga napatay kasunod sang daku nga landslide sa northern Papua New Guinea.
Masobra 150 ka mga balay sa Yambali village ang nalubong bangud sa pagtiphag sang duta suno kay Chief of Mission for the International Organization for Migration Serhan Aktoprak.
Una nga gin-report nga yara sa 4,000 ang populasyon sang bilog nga lugar, apang sa bag-o nga estimates, mas mataas ang numero sang mga residente nga nagapuyo sa apektado nga area.
Suno pa sa opisyal, yara sa 1,250 ka mga pumuluyo ang na-displace kag subong temporaryo anay nga nagatinir sa balay sang ila mga himata kag abyan.
Napaidalom man gihapon sa “extreme risk” ang area bangud nagakahulog pa ang mga bato kag mahumok ang duta samtang nga nagabakas man ang rescuers sa pagkutkot sa mga bangkay.
Natabo ini nga landslide sa isa ka nabaw-ing nga lugar nga amo ang Kaokalam, ginabanta 600 kilometers (372 miles) northwest sang capital nga Port Moresby.
Naghingyo na sang bulig sang iban nga mga pungsod ang National Disaster Centre nga kabahin sang Papua New Guinea government para nga mabuligan ang mga biktima.
Ang International Organization for Migration nga kabahin naman sang United Nations ang nagahatag na sang non-food items kaangay sang mga habol kag banig sa mga nawad-an sang puluy-an.
