ILOILO CITY- Naglab-ot na sa masobra sa 70 ektaryas nga mangroves ang nahalitan sang oil spill kasunod sang paglupok sang power barge sa Bo. Obrero, Lapuz, Iloilo City.
Sa interview sang Bombo Radyo kay Engr. Remia Aparri, Director sang Bureau of Fisheries and Aquatic Resources Region 6, iya ginpahayag nga sa inisyal nga damage assessment, 70 ektaryas ang nahalitan sa banwa sang Dumangas samtang ginabanta tatlo ka ektaryas naman sa area malapit sa naglupok nga power barge.
Suno kay Aparri, wala pa sang damage assessment sa iban nga lugar nga apektado man sang oil spill kaangay sang Leganes, Zarraga, Guimaras kag iban pa nga coastal barangays sa syudad.
Apang suno sa regional director, may reported fish kill na sa Guimaras apang ini ang ila pa gina-validate.
Nagpanugyan naman si Aparri nga likawan sang publiko ang pagkaon sang mga seafoods gikan sa mga areas nga apektado sang oil spill.
