Masobra 70 ka tawo ang gin-aresto sang otoridad sa Melbourne matapos ginlapas sang mga ini ang stay-at-home orders agud magprotesta batok sa ginapatuman nga lockdown restrictions.
Subong nga Domingo, Setyembre 13, ginabanta 250 ka tawo ang nagtambong sang iligal nga protesta nga ginpangunahan kag ginduso sang coronavirus conspiracy groups sa social media.
Nagtipon ang mga nagaprotesta sa central Queen Victoria market kag nagpanawagan sa gobyerno nga tapuson na ang sinemana nga lockdown sa ila nga syudad nga amo ang ikaduha nga pinakadaku nga syudad sa Australia.
Suno naman sa mga pulis, “many protestors were aggressive and threatened violence towards officers” rason nga gindakop ang 74 ka tawo kag ginmultahan ang 176 ka iban pa nila nga kaupod.
Matandaan nga sang nagligad nga semana, ginpatigayon ang “Freedom Day” events sa Australia agud magprotesta sa ginapahayag “overblown” nga response sang ila gobyerno sa pandemic.
Sabat naman ni Victoria Premier Daniel Andrews nga una na nga nagtawag sa mga nagaprotesta nga “selfish”, indi madali-dali sang Victoria ang pagbukas liwat sang estado.
“No-one is enjoying the reality we face, but none of us have the option of ignoring the reality that we face. We cannot open up now and stay open. It would not be safe, it would not be smart,” pahayag ni Andrews.
Magapabilin tubtob sa Oktubre 26 ang overnight curfew sa Melbourne, restrictions sa mga nagabisita sa mga balay, kag paglimit sa mga byahe nga nagasobra sa 5 kilometres (about 3 miles).
Sa kabug-usan, ang Australia ang nakarecord sang masobra 26,600 cases kag 810 nga patay out of 25 million nga populasyon.
(Photos are grabbed from: (AAP: Erik Anderson and ABC News; with reports from AGENCE FRANCE-PRESSE)
