Nagdangat na sa masobra 70 ka tawo ang napatay sa apat ka mga pagpang-atake sa Balochistan province sa southwestern Pakistan.
Suno sa militar, lakip ang 14 ka soldado kag mga pulis kag 21 ka mga militante sa napatay sa amo nga gamo ilabi na kasunod sang atake sa Lasbela district nga amo ang nag-target sa mga salakyan nga nagalabay sa major highway.
Sa separado naman nga kalakasan sa Musakhel district, gin-report sang local officials nga 23 ka mga sibilyan ang ginpatay kag 35 ka mga salakyan ang ginpangsunog.
Sa Kalat naman, 10 ang napatay nga ginalakipan sang lima ka pulis kag lima ka sibilyan kadungan sang pagsulong sa estasyon sang pulis amo man sa isa ka highway.
Ginatudlo nga ang may kahimuan amo ang Baloch Liberation Army (BLA) nga amo ang pinakaaktibo nga militant separatist group sa probinsya sa Pakistan.
Nahibaluan nga nagtimbuok ang militante nga mga pagpang-atake sa Pakistan halin sang nagbalik sa gahum ang mga Taliban sa kaiping nga pungsod Afghanistan sang 2021. Masami ini nagakatabo sa border province sang Khyber Pakhtunkhwa kag sa southwestern Balochistan nga amo ang kaiping sang Afghanistan kag Iran.
