Masobra sa 7,300 ka bakante nga trabaho ang igantayag sa job fair kadungan sang Labor Day sa Biyernes, Mayo 1, sa Iloilo City.
Hiwaton ini sa Robinsons Place Iloilo sa Ledesma St., City Proper.
Suno sa Department of Labor and Employment (DOLE) Region VI, ini nga job vacancies ang halin sa 69 local employers kag 10 overseas employers.
May yara sang 3,982 employment halin sa local companies samtang nagadangat naman sa 3,518 ang job vacancies abroad nga mahimo ma-avail sang job seekers.
Lakip sa listahan sang vacancies amo ang mga trabaho kaangot sa administrative kag support service activities; public administration kag defense; compulsory social security; construction; wholesale kag retail trade; kag manufacturing.
Yara man ang financial kag insurance activities; information kag communication; accommodation kag food services; real estate kag iban pa nga service activities; kag agriculture, forestry, kag fishing.
Suno kay Atty. Jorge Ferraris, ang officer-in-charge chief sang Technical Support and Services Division (TSSD) sang DOLE Western Visayas, may magakadto man nga mga ahensya sang gobyerno para sa one-stop shop agud mabuligan ang job seekers pananglitan kinahanglan nila ang mga dokumento para sa ila nga aplikasyon.
Lakip sa partner agencies amo ang Department of Health, Philippine National Police, Philhealth, PAG-IBIG, Philippine Statistics Authority (PSA), National Bureau of Investigation (NBI), kag iban pa.
Ginapanawagan man sang talatapan nga magparehistro anay online kag gamiton ang QR Code agud nga indi na mabudlayan sa mismo adlaw sang job fair.
Nahibaluan nga sa kabug-usan sa Pilipinas, masobra sa 115,000 employment opportunities ang magabukas sa job seekers sa nationwide job fairs sang DOLE sa Mayo 1.
