Nalakip ang Archdiocese of Jaro sa masobra 80 ka mga archdiocese kag diocese sa bilog nga Pilipinas nga magasuporta kag maga-upod buwas, Nobyembre 30, sa Trillion Peso March bilang panawagan sa pagtapna sa kurapsyon.
Sa interview sang Bombo Radyo kay Msgr. Meliton Oso, ang director sang Jaro Archdiocesan Social Action Center (JASAC), iya ginpahayag nga tuman ini ka maragtason nga hitabo bangud ini ang una nga tion nga maga-isa ang 86 ka mga simbahan agud mag-upod sa isa lang ka panawagan nga manabat ang tanan nga involved sa pagpangawat sa kaban sang gobyerno.
Ini nga numero ang nakumpirma man sa latest social media post sang Caritas Philippines, isa ka non-profit organization kag social arm sang Catholic Bishops’ Conference of the Philippines (CBCP).
Tumalagsahon ini nga sahi sang hublag-protesta suno kay Oso bangud may rally halin sa prelature sang Batanes pakadto sa Jolo. Mangin sa EDSA People Power Revolution suno sa iya, nakasentro lang anay ang daku nga hublag sa Manila, samtang naka-monitor lang ang iban.
“Ini sila maga-isa kag maga-unite sa isa lang ka panawagan: ‘lahat ng sangkot, dapat managot’,” suno kay Oso. “Ang last report nga nabaton ko, tanan nga diocese halin sa prelatura sang Batanes pakadto sa prelatura sang Jolo, may paghublag. Isa lang ang panawagan: ‘Lahat ng sangkot, dapat managot.’ Kag dapat nga ibalik ang kwarta nga kinawatan.”
Sa Archdiocese of Jaro, nagpaguwa sang circular letter si Jaro Archbishop Most Reverend Midyphil B. Billones, D.D. nga nagapanawagan sa mga tumuluo nga mag-upod sa patigayunon nga “Kahublagan Kontra Korapsyon” ukon KKK.
Sa iya sulat, gin-engganyo ni Archbishop Billiones ang mga parokya, religious communities, mga propesyunal, business groups, kabataan, kag civic organizations nga mag-isa para sa pagpanawagan sa pagtapna sa kurapsyon.
Ginpanawagan sini ang pagpasakop sa mga aktibidad kaangay sang candle-lighting events kag pagtipon para sa pagpangamuyo.
Mahimo man mag-upod sa streaming kag photo campaigns nga may mga mensahe kontra sa kurapsyon kag magbutang sang puti nga ribbon sa guwa sang mga eskwelahan kag pampubliko nga lugar.
Ginbutang man ang pagbagting sang lingganay sang simbahan; pagpatigayon sang mga diskusyon sa mga buluthuan, parokya, kag mga komunidad; kag pagpatigayon sang sectoral mobilization para sa kamatuoran kag hustisya.
Madumduman nga sang una nga hugnat sang anti-corruption protest sang Septyembre 21, lakip sanday Oso kag Billones sa nagmartsa kag nag-upod sa protesta.
Buwas, maga-umpisa ang martsa sang mga protesters sa University of the Philippines-Iloilo City kag sa atubang sang Jaro Metropolitan Cathedral, kag magatipon sa Iloilo Provincial Capitol Grounds umpisa alas tres sang hapon. Magalawig ang programa tubtub alas sais sa gab-i.#
