Ginpuhag sang daku nga sunog ang mga residente sa Barangay Tanza Bonifacio kag Barangay Rizal Estanzuela, Iloilo City Proper kaina nga kaaganhon kun sa diin naglawig pa sang masobra duha ka oras antes napalong.
Base sa Iloilo City Emergency Operations Center kag Bureau of Fire Protection-Iloilo City, nabaton ang fire call 2:15 a.m. kag nagdangat na sa 4th alarm eksakto 3:00 a.m.
Sa inisyal nga impormasyon, nag-umpisa ang sunog sa Tanza Bonifacio kag naglaton pati sa pila ka pamalay sa Rizal Estanzuela.
Nagbuligay man pati ang mga pumuluyo agud indi na maglapta ang kalayo kag nadeklarar nga fire out 4:37.
Padayon pa subong ang assessment apang sa inisyal man nga impormasyon, sa Tanza Bonifacio, 24 ka balay ang natupok kag 12 ang nakaangkon sang partial nga halit. 57 ka pamilya ang naapektuhan.
Sa pihak nga bahin, sa Rizal Estanzuela, 11 ka balay ang totally burned samtang siyam ang may porsyon nga nahalitan. 25 ka pamilya ang apektado.
Nagtinir ang apektado nga mga residente sa Tanza Parish Church dala ang pila ka nasalbar nga kagamitan kag kasapatan.
May inisyal nga impormasyon nga halin sa pamilya Zerrudo ang sunog apang gina-verify pa ini sang BFP kag ginahibalo kun ano ang rason.#
(Iloilo CDRRMO/Photo)
