ILOILO – 949 ka mga open/modified mufflers ang ginguba sang Iloilo Police Provincial Office kadungan sang 3-day challenge operation.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga tinutuyo sang hilikuton nga mapalapnap ang kampanya kontra sa open/modified mufflers.
Suno kay Araño, hugot niya nga ginapahanumdom sa mga pumuluyo nga indi mag-gamit sang nasambit nga tambutso agud malikawan ang noise pollution kag masiguro ang seguridad sang mga tawo.
Ini bangud ginareklamo sang mga tigulang ang tuman ka gahod nga tunog nagikan sa mga muffler nga nagatuga sang huol sa mga ini.
Ginpahayag dugang sang natungdan nga ginatun-an na sang mga ini ang mga ordinansa sang probinsya nga nagadumili sa pagbaligya sang tambutso sa mga shops agud ma-regulate ang pag-gamit sini.
